قاراعاندىدا وتكەن ءباسپاسوز كونفەرەنتسياسىندا كلۋبتى جەكەشەلەندىرۋدەن كەيىنگى نەگىزگى مىندەتتەر تانىستىرىلدى. سونداي-اق جاڭا ماۋسىمداعى ء«شاحتيوردىڭ» بيۋدجەتى بەلگىلى بولدى.
ء«بىزدىڭ باستى ماقساتىمىز – فۋتبولدى دامىتۋدىڭ بەرىك نەگىزىن قالاۋ. قازىر لەگيونەرلەرگە سالىناتىن ينۆەستيتسيا كولەمى بويىنشا باسەكەگە ءتۇسۋ ەمەس, قاراعاندى وبلىسىنداعى جاس تالانتتارعا باعىتتالعان, شىن مانىندە ساپالى سەلەكتسيالىق قىزمەتتى قالىپتاستىرۋ ماڭىزدى. وڭىردە دارىندى جاستار كوپ. ءبىز قازىردىڭ وزىندە اۋقىمدى جۇمىستى باستاپ, فۋتبول پيراميداسىن بالاباقشادان باستاپ كاسىبي كلۋبقا دەيىن تولىق رەفورمالاۋعا قاتىسىپ جاتىرمىز. «شاحتيور» جەرگىلىكتى جاستار ءۇشىن ماقتانىش پەن باعدارعا اينالۋى ءتيىس, قاراعاندى وبلىسىنىڭ, ءتىپتى بۇكىل ەلىمىزدىڭ ءاربىر بالاسى ويناۋدى ارماندايتىن كلۋب بولۋى قاجەت», دەدى Freedom Holding Corp. كومپانياسىنىڭ باس اتقارۋشى ديرەكتورى تيمۋر تۋرلوۆ.
ونىڭ ايتۋىنشا, 2026 ماۋسىمىندا ء«شاحتيوردىڭ» بيۋدجەتى 4 ملرد تەڭگەنى قۇرايدى, ال بۇل قاراجاتتىڭ جارتىسىنان استامى دامۋ باعىتتارىنا جۇمسالادى.
سونىمەن قاتار فۋتبول اكادەمياسىنىڭ قۇرىلىسىنا شامامەن 12 ملرد تەڭگە قاراستىرىلعان. بۇدان بولەك, كومپانيا وڭىردەگى بالالار-جاسوسپىرىمدەر جانە بۇقارالىق فۋتبولدى دامىتۋعا 6,5 ملرد تەڭگە ينۆەستيتسيا سالماق.
قاراعاندىدا UEFA-نىڭ 4-ساناتىنا سايكەس كەلەتىن جاڭا فۋتبول ستاديونى دا سالىناتىن بولادى.
«مەملەكەتتىڭ, ناقتىراق ايتقاندا, اكىمدىكتىڭ مىندەتى – كاسىبي ماماندارمەن كەلىسىلگەن زاماناۋي ينفراقۇرىلىم قالىپتاستىرۋ. قازىر ءبىز 1956 جىلى سالىنعان ەسكى ستاديوندى قايتا جاڭعىرتىپ جاتىرمىز. جۇمىستار وتكەن جىلى باستالدى: الاڭ جوندەلدى, ەندى تريبۋنا استىنداعى ورىندار مەن جالپى ينفراقۇرىلىمدى جاڭارتۋ جوسپارلانىپ وتىر. سونىمەن قاتار مايقۇدىق پەن وڭتۇستىك-شىعىس اۋداندارىنىڭ اراسىندا ورنالاساتىن سپورتتىق كلاستەر اياسىندا جاڭا, زاماناۋي جابىق ستاديوننىڭ جوبالاۋ جۇمىستارى جۇرگىزىلۋدە. جالپى العاندا, قالالار مەن اۋداندارداعى سپورتتىق ينفراقۇرىلىمدى دامىتۋ مىندەتتەمەسىن ءوز موينىمىزعا الامىز», دەدى وبلىس اكىمى ەرماعانبەت بولەكپاەۆ.
ءوڭىر باسشىسى ء«شاحتيوردى» ساتۋدان تۇسكەن 55 ملن تەڭگەنىڭ قايدا جۇمسالاتىنى جونىندەگى سۇراققا دا جاۋاپ بەردى. بۇل قاراجات بيۋدجەت كىرىسىنە ءتۇسىپ, سپورت سالاسىنىڭ قاجەتتىلىكتەرىنە باعىتتالادى.
«ەڭ باستىسى — بۇرىن اكىمدىك كاسىبي فۋتبولعا بيۋدجەتتەن ءبولىپ كەلگەن بارلىق قاراجات ەندى بالالار-جاسوسپىرىمدەر جانە بۇقارالىق فۋتبولدى دامىتۋعا, ينفراقۇرىلىمدىق جوبالارعا جۇمسالادى. بۇل قاراعاندى وبلىسىنىڭ كليماتتىق ەرەكشەلىكتەرىن ەسكەرە وتىرىپ اسا قاجەت جابىق مانەجدەر, تولىق ولشەمدى فۋتبول الاڭدارى جانە باسقا دا نىساندار بولادى», دەپ اتاپ ءوتتى Freedom QJ League پرەزيدەنتى روحۋس شوح.
